बुटवल -  लुम्बिनी प्रदेशका सभामुख तुलाराम घर्ति मगरले सचिवालय विघटन गरेका छन् । सभामुख घर्तिले संघीय सरकारको निर्देशनको पालना गर्दै सचिवालय विघटन गरेका हुन् । 

सभामुख घर्ती मगरले आइतबार विज्ञप्ति जारी गर्दै प्रदेशसभाका पदाधिकारी तथा सदस्यको पारिश्रमिक तथा सुविधासम्बन्धी ऐन, २०७५ को दफा ८ को उपदफा (१) अनुसार प्रदान हुँदै आएको स्वकीय सचिवालय तथा निजी कर्मचारी सुविधा विशेष परिस्थिति र वर्तमान अवस्थामा आवश्यकतालाई मध्यनजर गर्दै स्थगित गरिएको उल्लेख गरेका छन् । सचिवालय हटाउने निर्णय मंसिर १ गते (आज) देखि लागू हुने सूचनामा उल्लेख छ ।

सभामुखले स्वकीय सचिव, प्रेस संयोजक, स्वकीय सहायक, हलुका सवारी चालक र कार्यालय सहयोगिसहितको ५ सचिवालय बनाएका थिए । 

सभामुखको स्वकीय सचिवले उपसचिव बराबरको तलब भत्ता, प्रेस संयोजकले अधिकृत बराबरको सेवा पाउने गरी नियुक्त भएका थिए । सभामुखको सचिवालय विघटनसम्बन्धी पत्र प्रदेशसभा सचिवालयमा समेत गइसकेको छ ।