बुटवल- रुपन्देहीको देवदह–९ भलुहीमा रहेको न्यू नमुना ईङलिस बोर्डिङ्ग स्कुल कक्षा ५ की छात्रा जिविका रणपाल देवदह नगरपालिका स्तरीय श्रुतिलेखन प्रतियोगितामा प्रथम स्थान हासिल गरेकी छन् ।

देवदह नगरपालिकाद्वारा आयोजित  विभिन्न प्रतियोगिताअन्तर्गत कक्षा ४ र ५ को आधारभूत तह स्तरीय  श्रुतिलेखन प्रतियोगितामा  जिविकाले प्रथम स्थान हासिल गरेकी हुन् । त्यस्तैगरी सोही विद्यालयको कक्षा ८ मा  अध्ययनरत छात्रा कृष्टि विकले  डिक्टेशन लेखन प्रतियोगितामा तृतीय स्थान प्राप्त गरेकी छन् ।

प्रतियोगितामा विजयी  विद्यार्थीहरुलाई  सम्मानपत्रसहित नगद पुरस्कार प्रदान गरिएको छ । प्रतियोगितामा विजयी  विद्यार्थी तथा अभिभावकलाई  शुक्रबार  न्यू नमुना ईङलिस बोर्डिङ स्कुलका प्राचार्य चुडा बहादुर थापा र सहप्राचार्य लक्ष्मी पुन अधिकारीलगायतका शिक्षकहरुले  विद्यालय प्राङ्गणमा आयोजित कार्यक्रममा बधाई दिदै उत्तरोत्तर प्रगतिको शुभकामना व्यक्त गरे।

न्यू नमुना स्कुलले पढाईमा गुणस्तरीयताका  साथै आफ्ना विद्यार्थीहरुलाई अतिरिक्त क्रियाकलापहरुमा समेत सहभागी गराई विभिन्न कार्यक्रममा उत्कृष्टता प्रस्तुत गर्दै आएको छ । यस अघि चित्रकला प्रतियोगिता, गायन प्रतियोगिता र देवदह डान्स आइडललगायतका  विभिन्न प्रतियोगितामा  विजेता  हुँदै आएको विद्यालयका शिक्षक कृष्ण पन्थीले बताए ।

देवदह नगरपालिकाले यस अघि कक्षा १ देखि ३ सम्म चित्रकला प्रतियोगिता, कक्षा ६ देखि ८ सम्म डिक्टेशन  प्रतियोगिता र कक्षा ९ र १० सम्म हाजिरीजवाफ प्रतियोगिता आयोजना गरेको थियो । उक्त प्रतियोगिताको नतिजा यही मंसिर ३ गते सार्वजनिक गरिएको हो ।