बुटवल–बुटवल ११ न्यु दुर्गा नगर स्थित नहरमा खसेर अनिल भन्ने जुठे दमाई चार दिनदेखि वेपत्ता भएका छन् । न्यू दुर्गानगरबाट शुक्रबार राती साँढे ८ बजे नहरपुर जादै गर्दा कुलोमा खसेर दमाईको वेपत्ता भएका हुन् ।
दुर्गानगर स्थित तिनाउ नदीबाट मोतिपुर नहरपुर क्षेत्रका लागि लगिएको नहरमा बाढी आएकाले मोटरसाईकल सहित दमाई खसेको अनुमान गरिएको छ । नहरमा अनिलले चलाएको मोटरसाईकल भेटिएको छ ।
स्थानीय जनप्रतिनिधि, स्थानीय बासिन्दा, नेपाल प्रहरी र सशस्त्र प्रहरीको टोलीले खोजतलास जारी राखेपनि बाढीसँगै बगेका ती व्यक्तिलाई भेटाउन नसकेको प्रहरीले जनाएको छ । इलाका प्रहरी कार्यालय बुटवलका प्रहरी नायव उपरीक्षक इन्द्रबहादुर रानाले खोजतलास भइरहेपनि व्यक्ति पत्ता लाग्न नसकेको बताए ।
वडासदस्य शाही भन्छन्–‘कुलो सुकाउन सकिएन, नगरको सहयोग भएन’
बुटवल उपमहानगरपालिका वडा न. ११ का वडासदस्य नहकुल शाही आफैले नहरको पानी बन्द गराएर खोजविन गर्दा पनि पत्ता नलागेको बताएका छन् ।
उनले दमाईले प्रयोग गरेको मोटरसाईकल पत्ता लागेको भएपनि मान्छे फेला पार्न नसकेको बताए । उनले तिनाउबाट आएको कुलो समयमा सुकाउन नसक्दा बगेका मान्छेको अवस्था पत्ता लगाउन नसकेको सामाजिक सञ्जालमा लेखेका छन् ।
‘बुटवल ११ न्यु दुर्गा नगरका जुठे दमाईको खोजीको लागी उनको श्रीमती आफन्त जन रोइरहेको छ, नेपाल प्रहरी र सशस्त्र प्रहरीले थाहा पाउदा आउदा बुटवल नगर पालिकाले नगर प्रहरी पठाउँदैन, ट्याक्टर–डोजर मरेको कुकुर बिराला गाई गोरु गाड्ने बोक्ने पठाउछ,जेसिबी समेत छैन’ उनले सामाजिक सञ्जाल फेसबुकमा लेख्छन्–‘कुलो सुकाउन सकिन्थ्यो, आज ४ दिन भयो मान्छेको अत्तोपत्तो छैन ।
खोजी कार्यमा स्थानीय सरकार बुटवल उपमहानगरको चासो रहेन ।’ चार दिनदेखि अवस्था नभेटिएपछि आफन्तहरु अतालिरहेका छन् ।
