बुटवल– नेकपा एमालेका महासचिव शंकर पोखरेलले जेनजीका नाममा विदेशी शक्ति, राजावादी र सरकार विरोधी र पपुलिस्ट भनिने दलहरुको संलग्नतामा आगजनी र विध्वंस गराइएको बताएका छन् ।

प्रेस चौतारी नेपाल रुपन्देहीले सोमबार बुटवलमा आयोजना गरेको पत्रकार सम्मेलनमा बोल्दै युवाहरुको शान्तिपूर्ण आन्दोलनलाई अराजक बनाएको बताएका हुन् । उनले रास्वपा, राजावादी पार्टीहरुको नामै लिएर सहभागिता रहेको बताए भने विदेशी शक्तिका रुपमा फ्रि तिब्तीयन अभियानमा लागेकाहरुको संलग्नता भएको जिकिर गरे ।

उनले नेपालमा डिप स्टेटको अवधारणालाई कार्यान्वयन गर्न क्रियाशिल शक्ति र सरकार परिवर्तनका लागि लागेका स्वार्थी दलहरुको समेत सहभागिताले जेनजीको शान्तिपूर्ण प्रदर्शनलाई अराजकतामा लगिएको टिप्पणी गरे । उनले विदेशी शक्तिका रुपमा नाम नलिएपनि पश्चिमा देशहरुतर्फ संकेत गरे ।

‘बाह्य शक्तिहरुद्धारा फन्डिङ गरिएको र फ्रि तिब्तीयन मुभमेन्टमा लागेकाहरुको संलग्नताबारे मैलै भन्नुपरेन’ उनले भने –‘जेनजीको जुलुश बानेश्वर पुग्दा नपुग्दै त्यसलाई भड्काउन तीन दिशाबाट आधुनिक सवारी दस्ता त्यहाँ आयो, जुन टिओबी गुप्रहरुको थियो, जो नेतृत्वकर्ता थिए, ती जाली नागरिकताको अभियोगमा समातिएका छन्, यो नै बाहिरी शक्तिको संलग्नता हो, बाँकी पत्रकारहरुले खोज्नुपर्छ ।’ महासचिव पोखरेलले वर्तमान सरकार संसद र संविधानले नचिन्ने भएकाले प्रतिगामी भएको बताए ।

उनले वर्तमान सरकारले चुनाव गराउनै नसक्ने ठोकुवा गरे । ‘पहिलो कुरा यो सरकार चुनाव गराउनका लागि नै होईन, संविधान र संसदभित्रैबाट निकास निकाल्नुपर्छ’ उनले भने । उनले आफूहरुले भनेजस्तै संसद पुर्नस्थापना हुनुपर्ने माग सहित जनतामा गएको बताए । उनले भदौ २३ र २४ गतेको घटनाले जनताले नयाँ बाटो खोजेका छन भनेर भनिएपनि एमालेको २९ गतेको जनसभा र प्रदर्शनले जनादेश चाहेको बखत बदल्न नसक्ने स्पष्ट सन्देश दिएको बताए ।

‘आतंक, हिसा र ध्वंस खोजिएको राज्यद्रोह हो, २३ गतेको षडयन्त्रले मुलुकलाई असाधारण क्षति पुग्यो’ महासचिव पोखरेलले भने –‘सडकबाटै जनादेश खोज्ने भए एमालेले त्यसलाई खण्डित गरिसक्यो ।’ उनले संसद पुर्नस्थापना गरेर ताजा जनादेशमा जान सकिने बताए । उनले अदालतलाई समेत जनता संसद पुर्नस्थापनाको पक्षमा छन भन्नका लागि एमालेले सडकमा प्रदर्शन गरेको प्रष्टाए ।

 उनले जनेजीका मागहरुका बारेमा आफूहरु सकरात्मक रहेको बताए । तर, उनले जनेजीको आन्दोलनमा घुसपैठ र योजनाबद्ध भएको बताएपनि यसमा सरकारको तयारी नरहेको कुरा स्विकार गरे ।

‘कहिलेकाँही षडयन्त्रकारीहरु सफल हुँन्छन्’ उनले भने –‘सरकारले युवाहरुको आन्दोलन यस्तो होला भन्ने पनि सोचेन, अर्कोतर्फ नवयुवाहरु सामाजिक सञ्जालको लतमा रहेको कुरा थाहा भएन।’

नेतृत्व कार्यकर्ताले छान्छन्, निती पारित भइसक्यो 

एमाले अध्यक्ष ओलीका निकट मानिने पोखरेलले महाधिवेशनमा नीतिका बारेमा अब बहस गर्ने बेला सकिएको बताए । जेनजी आन्दोलनपछि बरिष्ठ उपाध्यक्ष इश्वर पोखरेलले नीति र नेतृत्वबारे छलफल हुने बताएको प्रसंगमा पत्रकारहरुले जिज्ञासा राखेपछि उनले यसबारे विधान अधिवेशनले टुंगो लगाएको स्पष्ट पारे ।

‘विधान अधिवेशनले नीतिको टुंगो लगायो, जेनजी पछिको अवस्थाबारे केन्द्रीय कमिटिको बैठकले सबैलाई बोल्न दिएर निर्णय गरिसक्यो’ उनले भने –‘नेतृत्वको आकाक्षा भन्दा पनि अब कार्यकर्ताको विश्वास जित्ने कुरामा लाग्नुपर्छ ।’

उनले नीतिको बिषयमा बहस सकिएको बताउँदै नेतृत्वबारे कार्यकर्ताले टुंगो लगाउने भएकाले कस्ले कहाँ के बोल्यो भन्नेको अर्थ नहुने बताए ।