बुटवल– सिदार्थ राजमार्ग अन्तरगत पाल्पा सिद्धबाबा नजिकै मंगलबार माथिबाट खसेको पहिरोमा परि मोटरसाईकलमा सवार २ जना घाईते भएका छन् । तिनाउ गाउँपालिका ३ सिद्धबाबा पहिरो क्षेत्रमा बुटवलबाट पाल्पा रामपुर जादै गरेको लु५१ प ६६३३ नंको मोटरसाईकलमा सवार श्रीमान श्रीमती घाईते भएका हुन् ।

पाल्पा रामपुर नगरपालिका ६ तालपोखरा निवासी ३६ बर्षिय जनक भण्डारी र उनकी श्रीमती २९ बर्षिय कल्पना चापागाईँ घाईते भएको पाल्पा प्रहरीले जनाएको छ ।

पहिरोले गुड्दै गरेको मोटरसाईकललाई बगाएर सडकबाट तल बगाएको थियो । मोटरसाईकल चालक भण्डारी सडकबाट उछिटिएर सडक तल र कल्पना सडक छेउमा अडकिएको अवस्थामा दोभान प्रहरी चौकीले उद्धार गरेको हो ।

साँझ साँढे ६ बजेतिर घटना भएको भएपनि आधा घन्टाभित्रै दोभान प्रहरीका प्रहरी नायव निरीक्षक रुमबहादुर केसी नेतृत्वको टोलीले उद्धार गरेको हो । प्रहरीले तुरुन्तै उद्धार गरेकाले थप क्षती हुन नपाएको प्रत्यक्षदर्शीले बताएका छन् ।  

मोटरसाईकल चालक भण्डारीको टाउकोमा चोट लागेको छ। दुई जनाको लुम्विनी प्रादेशिक अस्पताल बुटवलमा उपचार भइरहेको छ ।