बुटवल– राष्ट्रिय प्रजातन्त्र पार्टी (राप्रपा) लुम्बिनीका अध्यक्ष प्रदीप उदयले देवत्वकरण र दानवीकरण गर्न छाडेर पार्टी निर्माणमा लाग्न आग्रह गरेका छन् । उदयले मंगलबार एक प्रेस विज्ञप्ती जारी गर्दै सबैलाई विवादबारे सघन छलफल गर्न अपिल गरेका छन्।
उनले राप्रपा पुरानो र नयाँ पुस्ताको संगम रहेको भन्दै विगतका कमजोरीलाई सच्याएर अघि बढ्नुपर्ने बताएका छन्। यदि नयाँ पुस्ताले राप्रपा अघि नबढाएको भए राप्रपा इतिहासमा सीमित हुने बताएका छन्। उनले आशा भरोसा देखाएका बेला किचलो गर्न नहुने बताएका छन्।‘अब पनि हामीमा चेत नपलाउने हो भने पुरानो र नयाँ पुस्ताको भविष्य अन्धकार हुन्छ। ठूला दल भनाउँदाको अकर्मण्यताले आकान्त भएर जनताले विकल्प खोजिरहेका छन्’ उनले भनेका छन्,’जनता र देशको हितमा कार्ययोजना अघि सार्नुपर्ने थियो।’ उनले भनेका छन् ।
उनले नेताहरूलाई सबै खेल बन्द गर्न र सामाजिक सञ्जालमा अपाच्य भाषा प्रयोग रोक्न अनुरोध गरेका छन्। उदयले बैठक बसेर सबैलाई एकताको सन्देश दिन उनको अनुरोध छ । पछििल्लो समय किचलो बढिरहेको राप्रपामा नेताहरू ध्रुवीकृत हुने क्रम जारी छ।
संस्थापन मानिएको राजेन्द्र लिङ्देन पक्षधर र इतर मानिएको धवल शमशेर जबराबीच गुटगत प्रवृत्ति बढेको छ। इतरपक्षकै समर्थन पाएका पुराना नेता नवराज सुवेदी र सगुन सुन्दर लावती संस्थापनले विधि भत्काएर पद खोसेको आरोप लगाउँदै निर्वाचन आयोग पुगेपछि विवाद बाहिर आएको छ।
राजसंस्था पुन स्थापनाका लागि गठित समितिको संयोजक रहेका सुवेदीले राप्रपा छाडेको घोषणा गरेपछि संस्थापनले उनी अध्यक्ष रहेको अनुशासन समितिको जिम्मेवारी उपाध्यक्ष रोशन कार्कीलाई दिइएको थियो। लावतीलाई भने लिङ्देनले प्रवक्ता मोहन श्रेष्ठको हस्ताक्षरमा विज्ञप्ति निकाल्दै प्रवक्ताको जिम्मेवारीबाट हटाएको जानकारी दिएका थिए।
