बुटवल– पछिल्लो २४ घण्टामा देशभर भएको बर्षामा लुम्बिनी प्रदेशका चार जिल्लामा धेरै वर्षा भएको छ । जल तथा मौसम विज्ञान विभागका अनुसार मध्यमदेखि धेरै भारी वर्षा भएको सूचीमा यहाँका चार जिल्लामा धेरै बर्षा भएको देखिएको हो ।
पछिल्लो २४ घन्टामा सबैभन्दा धेरै वर्षा अर्घाखाँचीको स्टेशनमा मापन भएको विभागले जनाएको छ । अर्घाखाँचीमा ११५ मिलिमिटर वर्षा भएको छ ।
यस्तै दाङको एक स्टेशनमा १०२.४, रुपन्देहीमा १०६ र नवलपरासीमा १०५.६ मिलिमिटरभन्दा बढी वर्षा मापन गरिएको छ । यसलाई मौसम विज्ञानको भाषामा धेरै वर्षा भएको भनिन्न । २४ घण्टाको अवधिमा १०० देखि २०० मिलिमिटरसम्म वर्षा हुनु धेरै भारी वर्षा हुनु हो ।
लमजुङ, पाल्पा, गुल्मी, सिन्धुपाल्चोक, कपिलवस्तु, बर्दिया र बाँकेमा पनि ठूलो वर्षा भएको छ । यी क्षेत्रमा ९० मिलिमिटर वर्षा मापन भएको छ । ५० देखि १०० मिलिमिटरसम्म वर्षा हुनुलाई भारी वर्षा भएको मानिन्छ ।
धादिङ, बारा, रौतहट र पाल्पामा पनि अत्यधिक वर्षा भइरहेको छ । यी क्षेत्रमा वर्षा जारी रहेको विभागले जनाएको छ ।
आज पनि सबै प्रदेशका धेरै स्थानहरूमा मेघगर्जनरचट्याङसहित वर्षाको सम्भावना रहेको छ । पछिल्ला दिन निरन्तर वर्षा भइरहेको छ ।
केही ठाउँमा ठूलो वर्षा भएकोले नदीमा जलसतह पनि बढेको छ । त्यसैले नदीको तटीय क्षेत्रमा बसोवास गर्नेहरूलाई सतर्क रहन आग्रह गरिएको छ ।
