बुटवल - लुम्बिनी प्रदेशसभा सदस्य गीता गुरुङले आफ्नो पदबाट राजीनामा दिएपछि सो ठाउँमा जनमत पार्टीले अर्को समानुपातिक सदस्य चयन गर्ने भएकाे छ ।
गुरुङको ठाउँमा निलम पासवानको नाम निर्वाचन आयोगमा सिफारिस गर्न लागेको जनमत पार्टी स्रोतले जनाएको छ ।
गुरुङ आदिवासी जनजाति (महिला) कोटाबाट समानुपातिक सदस्य भएकी थिइन् । उनको नाम बन्द सूचीको दोस्रो नम्बरमा थियो । उनले राजीनामा दिइसकेपछि आदिवासी जनजाति कोटामा पुरुषतर्फ राजनकुमार श्रेष्ठ प्रदेशसभा सदस्यमा समानुपातिक उम्मेदवार छन् ।
सूची अनुसार उनको नाम पठाउनुपर्ने हुन्। तर जनमत पार्टी लुम्बिनी प्रदेश समितिका सदस्य समेत रहेका श्रेष्ठ पार्टीको सम्पर्कमा नआएका कारण निलम पासवानको नाम पठाउन लागिएको सो पार्टीका एक पदाधिकारीले बताए ।
निलम पासवानको दलित कोटाको बन्दसूची क्रमसंख्या ४ नम्बरमा नाम छ । जनमत पार्टीले आदिवासी जनजातिको कोटामा दलित कोटाको नाम पठाउन लागेको हो ।
सो प्रदेशमा समानुपातिक सूचीको आदिवासी जनजाति कोटामा दुई जनाको नाम रहेको छ । त्यसमध्ये गुरुङले राजीनामा दिइसकेकी छन् भने श्रेष्ठ सम्पर्कमा नै छैन । दलित कोटा पनि एक पुरुष र एक महिला गरी दुई जनाको नाममा छ ।
निलम मधेस प्रदेश सिरहाकी हुन् तर उनी लुम्बिनी प्रदेशमा बसाइ सराइ गरिसकेको पार्टीले दाबी गरेको छ । पार्टीका अध्यक्ष डा.सिके राउत मुलुक बाहिर छन् । उनी स्वदेश फर्केपछि अर्को हप्तातिर निर्वाचन आयोगमा निलमको नाम सिफारिस गर्ने बताइएको छ ।
गीता गुरुङले आफ्नो व्यस्तताको कारण देखाउँदै प्रदेश सभा सदस्यबाट वैशाख ३० गते राजीनामा दिएकी थिइन् ।
