बुटवल : नेपाल विद्युत प्राधिकरण, लुम्बिनी प्रादेशिक कार्यालय बुटवलले लुम्बिनी प्रदेशका सबै जिल्लामा विद्युतिय सुरक्षा सम्बन्धि एक हप्ते सचेतना कार्यक्रम संचालन गर्ने भएको छ ।  आइतबारदेखि सञ्चालन हुने कार्यक्रममा लुम्बिनि प्रदेशका एक  सय बिद्यालयबाट ५  हजार जनालाई सचेतना तालिम दिईने भएकाे हाे । 

धेरै भन्दा धेरै विद्युत उपभोक्ताहरुलाई विद्युतिय  सुरक्षा सम्बन्धि सचेतना दिनका लागि कार्यक्रमको आयोजना गरिएको सहभागि हुने लुम्बिनी प्रादेशिक कार्यालयका प्रमुख ई. हरि प्रसाद पाण्डेले बताए । लुम्बिनी प्रादेशिक कार्यालयको उद्देश्य अनुरुप प्रादेशिक कार्यालय अन्तर्गतका सबै वितरण केन्द्रको कार्यक्षेत्रमा रहेका तुलनात्मक रुपमा धेरै विद्यार्थी अध्ययन गर्ने इच्छुक सामुदायिक विद्यालयहरुमा आइतबारदेखि एक हप्तासम्म उक्त कार्यक्रम  संचालन गर्न लागिएको उनले बताए  ।

घरघरमा बढ्दो विद्युतीय उपयोग, विद्युतीय सवारीको प्रयोग, सिंचाई विद्युतीकरण संगसंगै विद्युतिय दुर्घटनाको संख्या बढीरहेको सन्दर्भमा आम नागरिकहरुमा सुरक्षा सम्बन्धि जानकारी र सचेतना फैलाई  विद्युतिय दुर्घटना न्यूनीकरण गर्ने उद्येश्यले नेपाल विद्युत प्राधिकरणले यो कार्यक्रम संचालन गर्न लागेको हो ।

पहिलो चरणमा लुम्बिनी प्रदेशका २१ वटा वितरण केन्द्रहरुले करिब १ सय  भन्दा बढी विद्यालयहरुमा कार्यक्रम संचालन गर्न लागेको  लुम्बिनी प्रादेशिक कार्यालयका प्रमुख ई. हरि प्रसाद पाण्डेले बताए । समाजमा जनचेतना फैलाउने र जानकारी प्रदान गर्नको लागि विद्यालय नै उपयुक्त माध्यम भएको र यो कार्यक्रमको माध्यमबाट बिजुलीको सुरक्षित उपयोग कसरि गर्ने, चट्याङ बाट कसरि जोगिने, विद्युत चोरी गर्दा के कस्तो जोखिम हुन्छ र जरीवाना हुन्छ, र बिजुलीको महसुल छिटो र ढिलो बुझाउदा हुने छुट र थप दस्तुरको सम्बन्धमा परिवार -परिवारमा सूचना प्रवाह समेत हुने कार्यक्रमका  संयोजक ई. राम प्रसाद ज्ञवालीले बताए ।

कार्यक्रम संचालन गर्नको लागि इच्छुक अन्य विद्यालयहरुले संबन्धित  जिल्लाका वितरण केन्द्रमा सम्पर्क गर्न सकिने उनले बताए ।

यस्ता खालका  कार्यक्रमले नागरिकहरुलाई विद्युतिय जोखिमबाट कसरि जोगिन सकिन्छ भनेर सिकाउन निकै ठुलो मद्दत पुग्ने उनले बताए  ।