​बुटवल - बुटवलको सामाजिक र व्यावसायिक क्षेत्रमा एउटा स्थापित नाम हो- यदुमणी पोखरेल। वि.सं. २०४४ सालमा गुल्मीको धुर्कोटस्थित एउटा साधारण गाउँमा जन्मिएका पोखरेल आज बुटवलकै जेठो र गरिमामय सामाजिक संस्था ’बुटवल जेसिज’को ५३ औँ अध्यक्षका रूपमा उभिएका छन्। 

​बुटवल उपमहानगरपालिकाका प्रमुख खेलराज पाण्डेको प्रमुख आतिथ्यतामा सम्पन्न समारोहमा पोखरेलले वर्ष २०२६ का लागि नेतृत्वको बागडोर सम्हालेका हुन्। निवर्तमान अध्यक्ष मोहन न्यौपानेले उनलाई नेतृत्वको प्रतीक ’चेन’ हस्तान्तरण गरेसँगै बुटवल जेसिजमा विधिवत् रूपमा नयाँ कार्यकालको सुरुवात भएको छ।

​निष्ठाको जगः दिदीको सेवादेखि विधिको शासनसम्म

​यदुमणी पोखरेलको नेतृत्वको जग ’निष्ठा र सेवा’ मा अडिएको छ। उहाँको जीवनको पहिलो पाठशाला आफ्नी शारीरिक रूपमा अशक्त दिदी यमुनाको स्याहारसुसार बन्यो, जहाँ उहाँले निस्वार्थ सेवाको अर्थ बुझ्नुभयो। दिदीको असामयिक वियोगले दिएको घाउलाई शक्तिमा बदल्दै उहाँले मानवताको सेवालाई नै जीवनको दर्शन बनाउनुभयो। आज उहाँले सञ्चालन गरिरहेको व्यावसायिक प्रतिष्ठान ’नवज्योति सर्जिकल हाउस’ पनि त्यही सेवाभावको एउटा विस्तारित रूप हो। 

​जेसिजको यात्रामा लागेदेखि नै उहाँको एउटै अडान छ— विधिको शासन। विशेष गरी नेपाल जेसिजको टिकापुर क्षेत्रीय सम्मेलनमा बैठक प्रणाली र व्यवहारमा तालमेल नदेख्दा उहाँको मनमा एउटा ज्वाला बल्यो र प्रण गर्नुभयो- “शासन व्यक्तिको होइन, विधिको हुनुपर्छ“। यही सिद्धान्तलाई संस्थामा स्थापित गर्न उहाँले, अध्यक्ष बन्ने सङ्कल्प गर्नुभएको थियो। 

​मुख्य प्रकरण : निष्ठासहितको नेतृत्व

​पदभार ग्रहण गर्दै नवनिर्वाचित अध्यक्ष पोखरेलले यो वर्ष केवल व्यक्तिको होइन, विधिको शासन र करुणाको नेतृत्व कायम गर्ने वर्ष हुने उद्घोष गर्नुभएको छ। उहाँको नेतृत्वका मुख्य विशेषताहरू विधि, प्रविधि र प्रभाव हुन्। 
​मन्तव्यका क्रममा उहाँले भन्नुभयोः
​“नेतृत्व पद होइन, प्रतिबद्धता हो। परिवर्तन सपना होइन, संकल्प हो। मेरो कार्यकाललाई अनुकरणीय एवं उदाहरणीय जेसिज वर्ष बनाउँदै निवर्तमान नेतृत्वले थालेका अधूरा एजेण्डाहरूलाई थप नयाँ योजनाका साथ सफल बनाउनेछु।“ 

​२०२६ को सशक्त टिम

​यदुमणीको नेतृत्वमा वर्ष २०२६ का लागि एउटा कुशल टिम चयन भएको छ। जसमा कार्यकारी उपाध्यक्षमा मनोजलाल श्रेष्ठ र विकास पन्थी, उपाध्यक्षमा सम्राट कुँवर र सरोज पोखरेल रहेका छन्। यस्तै, महासचिवमा कमल प्रसाद शर्मा, कानूनी सल्लाहकारमा माधव पराजुली, र कोषाध्यक्षमा रमेश न्यौपाने रहेका छन्।

​समारोहका प्रमुख अतिथि खेलराज पाण्डेले जेसिजमा विधिको शासन अभ्यास गरेका युवाहरू राजनीतिमा आउँदा देशकै शासन पद्धतिमा सकारात्मक परिवर्तन आउने विश्वास व्यक्त गर्नुभयो।
​
यदुमणी पोखरेलको नेतृत्व केवल एउटा कार्यकालको निरन्तरता मात्र होइन, यो ’निष्ठासहितको नेतृत्व’ मार्फत बुटवल जेसिजलाई एउटा नयाँ मानक दिने अभियान हो। वर्ष २०२६ मा बुटवल जेसिजले “पदभन्दा पद्धति र भाषणभन्दा निष्ठा“ लाई कसरी व्यवहारमा उतार्छ, त्यो भने हेर्न लायक हुनेछ।