बुटवल- बुटवल–८ सुख्खानगरस्थित क्यानन माध्यामिक विद्यालयको आयोजनामा दोस्रो क्यानन सेभेन ए साइड फुटबल प्रतियोगिता आईतबारदेखि सुरु भएको छ । प्रतियोगिताको एक समारोहका विच रुपन्देही फुटबल संघका अध्यक्ष लोक पुनले उद्घाटन गरे ।

 

उद्घाटनका अवसरमा बोल्दै अध्यक्ष पुनले विद्यालयहरुले खेलकुदलाई अनिवार्य पाठ्यक्रममा राखेर अगाडि बढाउनुपर्नेमा जोड दिए ।यस्तै उद्घाटनका अवसरमा क्यानन माविका अध्यक्ष थानेश्वर पौडेलले खेलको विकास र विद्यार्थीहरुलाई सामाजिक, आर्थिक, शैक्षिक रुपमा भविष्य बनाउने प्ररेणाका लागि प्रतियोगिता गरेको बताए ।

यसैगरी विद्यालयका प्राचार्य शंकर भण्डारीले आफूहरुले सेभेन ए साईड फुटबल प्रतियोगितालाई ब्राण्डका रुपमा स्थापित गर्ने जमर्को स्वरुप जिल्ला स्तरीय प्रतियोगिता गरेको बताए । उनले हरेक विद्यालयले एउटा विधाको खेललाई प्रोत्साहन गर्नसक्ने बताए ।
सोमबार भएको उद्घाटन खेलमा ६ वटा विद्यालय अघिल्लो चरणमा प्रवेश गरेका छन् ।

 

सिद्धेश्वर खेलमैदानमा भएको पहिलो खेलमा सेभेन स्टार विद्यालयलाई कान्ति माविले १–० ले पराजित गर्‍यो । कान्ति माविका रञ्जित कुँवरले गरेको १ गोल नै निर्णायक भयो ।
यस्तै दोस्रो खेलमा गत वर्षको विजेता स्कलर्स होम बोर्डिङ स्कूले नविन औद्योगिक मावि बुटवललाई पराजित गरेको छ । निर्धारित समय गोलरहित बराबरी भएपनि खेल ट्राइबेकरमा ३–२ ले स्कलर्स होमले जित निकालेको हो । ट्राइबेकरमा स्लकर्सका गोलकिपर नविन मस्राङ्गीले उत्कृष्ट बचाउ गर्दै खेलमा जित निकाले ।
प्रतियोगिता अन्तर्गत आईतबार भएको तेस्रो खेलमा समिट बोर्डिङ स्कूललाई ट्राईबेकरमा अक्सफोर्ड माविको ‘ए’ ले ३ गोल गरी विजयी भएको छ ।

 

यसैगरी चाथौ खेलमा न्यू नमूना स्कूल प्रतियोगितामा नआएपछि ग्लोरी बोर्डिङ स्कूल वाकओभर पाएर अगाडि बढेको विद्यालयका अतिरिक्त क्रियाकलाप प्रमुख मिनराज गिरीले बताए । पाँचौ खेलमा नविक औद्योगिक कदर बहादुर रीता माविले तिलोत्तमा माविलाई १–० ले पराजित गराएको छ । नविन बिका नविन परियारले एक गोल गरेका थिए ।  यसैगरी दीप बोर्डिङ स्कूल र एभरेष्ट बोर्डिङ स्कूलका विचमा भएको अन्तिम तथा छैटौं खेलमा ट्राईबेकर मार्फत एभरेष्ट बोर्डिङ स्कूल विजयी भएको छ ।
१९ गतेसम्म चल्ने प्रतियोगितामा २९ वटा विद्यालयले भाग लिएका छन् ।

 

प्रतियोगिता अन्तर्गत सोमबार पनि ६ वटा खेल हुने खेल संयोजक पवन बस्यालले बताए । प्रतियोगितामा विजेता टिमले ५५ हजार ५५५, उपविजेताले ३३ हजार ३३३, उत्कृष्ट खेलाडीले ३ हजार रुपैयाँ सहित पुरस्कृत गरिने सहप्राचार्य विष्णु प्रसाद न्यौपानेले बताए । प्रतियोगितामा उत्कृष्ट गोल रक्षक र गोल स्कोरलाई  ३/३ हजार तथा हरेक खेलको म्यान अफ दिन म्याचलाई ५५५ रुपैयाँले पुरस्कृत गरिएको छ । गत वर्ष स्कलर्स होम बोर्डिङ स्कूलले उपाधि चुमेको थियो भने नविन औद्योगिक कदरबहादुर रीता मावि उपविजेता बनेको थियो ।