बुटवल - न्यू होराइजन अंग्रेजी आवासीय मावि बुटवलले माध्यमिक शिक्षा परीक्षा एसईईमा ४ जीपीएसहित उत्कृष्ट नतिजा ल्याएका विद्यार्थी तथा अभिभावकहरुलाई सम्मान गरेको छ  । सोमबार विद्यालयमा एक कार्यक्रम आयोजना गरी ४ जीपीए ल्याउने ११ जना सहित तीन सय जना विद्यार्थी र अभिभावकलाई सम्मान गरिएको हो ।  

कार्यक्रममा बोल्दै विद्यालयका प्राचार्य उपाध्यायले न्यू होराइजनले हालसम्मकै उत्कृष्ट नतिजाको रेकर्ड कायम गरेको बताए । विद्यालयले विगतदेखि नै उत्कृष्ट नतिजा ल्याउने गरेकोमा यसपटक विगतका रेकर्ड तोडेको उनले बताए ।  

गुणस्तरीय शिक्षाका लागि विद्यालय सधैँ दत्तचित्त रहेको र यसमा शिक्षक, विद्यार्थी र अभिभावकहरुको मेहनत र योगदान गरेको बताए । न्यू होराइजन संस्थागततर्फ धेरैजनाले ४ जीपीए ल्याउनेमा संभवतः नेपालमै प्रथम भएको उनको दावी छ । 

विद्यालयका अध्यक्ष ज्ञानेन्द्र कसजुले उत्कृष्ट नतिजाका लागि विद्यालयले दक्ष शिक्षक, विद्यार्थीमैत्री शैक्षिक वातावरण र भौतिक पुर्वाधारमा ठूलो लगानी गरेको बताए । उनले न्यू होराइजनमा ११र १२ कक्षा समेत सञ्चालन रहेकाले यहां अध्ययन गर्न चाहने विद्यार्थीका लागि छात्रवृतिको  व्यवस्था गरिने उनले बताए ।  

कक्षा ११–१२ मा विज्ञान तथा व्यवस्थापन विषय अध्ययन गर्न चाहने विद्यार्थीका लागि आवश्यक पर्ने सम्पूर्ण भौतिक पूर्वाधार तथा दक्ष, अनुभवी एवं पूर्णकालीन प्राध्यापकसँगै उत्कृष्ट वातावरण रहेको कसजूले बताए । कार्यक्रममा बोल्दै ४ जीपिए ल्याएका विद्यार्थी बेदान्त गौतमले न्यू होराइजनमा अध्ययनका लागि उत्कृट शैक्षिक वातावरण रहेको बताए । साथै उनले आगामी शैक्षिक यात्रा पनि यसै विद्यालयबाटै अघि बढाउने बताए ।  

यस्तै अभिभावक गंगाराम भट्टराई र सुमित्रा शर्मा लागायतले बोल्दै हरेक वर्ष उत्कृष्ट नतिजा र राम्रो शैक्षिक वातावरण भएका कारण बुटवल बाहिरका विद्यार्थी र अभिभावकको रोजाइमा न्यू होराइजन पर्ने गरेको बताए ।

एसईई पछिको उच्च शिक्षामा बालबालिकाहरुको रुचि र चाहाना अनुसारको विषय छनोट गरी भर्ना गरेमा सफल हुन सकिने बताउँदै उत्कृष्ट नतिजाका लागि विद्यालय परिवारलाई धन्यवाद व्यक्त गरे ।  

एसईईमा न्यू होराइजनबाट ११ जना बिद्यार्थीले ४ जीपीए, १२५ जना बिद्यार्थीले ‘ए प्लस’, ९९ जना बिद्यार्थीले ‘ए’, ५९ जना बिद्याथीले ‘बि प्लस’ र  ६ जना बिद्यार्थीले ‘बि’ ग्रेड ल्याएका कक्षा १० संयोजक प्रकाश गौतमले बताए ।

कार्यक्रममा विद्यालयका उपप्राचार्यहरु बालकृष्ण भण्डारी र बासुदेव अर्याल लगायतले बोल्दै उत्कृष्ट नतिजा आउनुमा समाजका सबै पक्षको सल्लाह, सुझाव र साथले पनि काम गरेको बताए ।