भैरहवा – भैरहवामा  एकै लेखक कपिल लामिछानेका पाँच बालकथासङ्ग्रहको सामूहिक लोकार्पण तथा परिचर्चा सम्पन्न भएको छ। प्रस्रित प्रतिष्ठान नेपालले आयोजना गरेको उक्त कार्यक्रम भुँडी पुराण प्रकाशनद्वारा प्रकाशित कृतिहरू— ‘जाती आमा’, ‘आफ्नै ठाउँ’, ‘भकुन्डे भूत’, ‘दुम्सीलाई तक्मा’ र ‘बिरालाको लोकतन्त्र’ —को सार्वजनिक विमोचनका लागि विशेष रूपमा आयोजना गरिएको थियो।

कार्यक्रम लुम्बिनी बौद्ध विश्वविद्यालय अनुसन्धान केन्द्रका निर्देशक प्रा.डा. गितु गिरीको प्रमुख आतिथ्य, डा. नारायणप्रसाद पन्थको अध्यक्षता र कृष्णप्रसाद बस्यालको सञ्चालनमा सम्पन्न भयो। पाँच कृतिको संयुक्त लोकार्पण प्रमुख अतिथि, सभाध्यक्ष, कृतिकार तथा साहित्यकार डिल्लीराज भट्टराई, सरु ज्ञवाली, रुद्र ज्ञवाली, विजय सागर, वनमाली निराकार लगायतका अतिथिबाट सामूहिक रूपमा गरिएको थियो। कृतिकारका अनुसार एकै लेखकका पाँच बालकथासङ्ग्रह एउटै मञ्चमा लोकार्पण हुने यो पहिलो घटना हो।

कृतिको समीक्षा तथा परिचर्चा डा. शालिकराम पौड्याल, डा. प्रेम तिवारी र डा. त्रिभुवन बरईले गर्नुभयो। समीक्षकहरूले यी कृतिहरूले पर्यावरणीय चेतना, सामाजिक–सांस्कृतिक रूपान्तरण र स्वस्थ लोकतान्त्रिक राजनीतिक बोध विकासमा योगदान गर्ने निष्कर्ष प्रस्तुत गरे। साथै कृतिहरू स्कुले बालबालिका तथा अभिभावकका लागि मनोरञ्जन, सकारात्मक सन्देश, व्यावहारिक शिक्षा, पर्यावरणप्रेम र देशभक्तिको स्रोत हुने बताइयो।

कार्यक्रममा प्रमुख अतिथि प्रा.डा. गितु गिरी, साहित्यकार वनमाली निराकार, बालस्रष्टा सुश्रुतराज न्यौपाने, साहित्यकार रमेश समर्थन, रुद्र ज्ञवाली, सरु ज्ञवाली, भरत पोखरेल, बूँद राना, सखिशरण सुवेदी लगायतले मन्तव्य व्यक्त गर्दै कृतिको महत्व र उपादेयतामाथि प्रकाश पारे।

कार्यक्रममा तिलक लामिछाने, तेजप्रसाद पन्थ, दीपक प्रधान, नारायणप्रसाद भण्डारी, पुनहरि बेल्बासे, प्रकाशलाल श्रेष्ठ, राजेशकुमार चौधरी, रामबहादुर श्रेष्ठ, लता प्रधान, विष्णुप्रसाद गजुरेल, डा. शङ्करप्रसाद नेपाल, सीता ढुङ्गाना काफ्ले, सिर्जना खनाल, सुरज घिमिरे दीपशिखा, डा. अजित खनाल, ईश्वरी पोखरेल, राजु भुसाल, दयानिधि गौतम, सुमन्तराज न्यौपाने, लीलमणि पाण्डेय, युवराज शर्मा खनाल, हरि थापासहित ४१ जना साहित्यप्रेमीहरूको उल्लेखनीय उपस्थिति रहेको थियो।

सभाध्यक्ष डा. नारायणप्रसाद पन्थले बालकथासङ्ग्रहहरू विद्यालयका बालबालिका तथा अभिभावकका लागि “अतिरिक्त बौद्धिक खुराक” भएको उल्लेख गर्नुभयो। कृतिकार कपिल लामिछानेले आफ्ना कृतिहरू देश, समाज र बालबालिकालाई केन्द्रमा राखेर दीर्घ साधनाको फलस्वरूप तयार भएको बताउनुभयो।

सङ्ग्रहका चित्राङ्कन राजकुमार प्रजापतिले तयार पार्नुभएको हो भने सम्पादन प्रा.डा. ध्रुवकुमार घिमिरेले गर्नुभएको छ। कार्यक्रम भैरहवास्थित होटेल पौवाको सभाहलमा सम्पन्न भएको थियो।